苹果 【拳怕少壯】37歲 崔建邦…

#苹果#【拳怕少壯】37歲#崔建邦#不敵15歲選手 硬食重拳嘴都腫..崔建邦喺九展「E-1 WORLD CHAMPIONSHIP」拳擊比賽迎戰15歲英籍印度人TAQDEER SINGH。賽事總共進行四個回合,每個回合一分鐘;到晚上9點鐘,拳賽正式開始。崔建邦穿上黃色打拳褲,喺Round 1嘅時候,阿邦穩守突擊,不時試探對手,睇準機會先出手,打得都幾穩陣;亦避到對方嘅攻擊。現場好多觀眾都撐阿邦,每當阿邦打中對手,觀眾都會歡呼。到Round 2,15歲選手採取主動,令阿邦都食咗幾拳;不過阿邦都撐得住,喺台不斷上走位。去到Round 3,15歲選手不斷進攻,阿邦只好一路防守,雖然尾段阿邦都還擊到一兩拳,不過睇得出佢體力開始下降,始終拳怕少壯。殺入Round 4,雙方出盡力去應戰,15歲選手有幾下直拳重擊到阿邦頭部,見到阿邦下顎同嘴唇位置開始紅腫,不過阿邦都可以撐到最後,仲有幾拳打到對方。全場都為阿邦打氣,當四個回合完結時,現場觀眾大叫「Amigo好嘢」;本身觀眾以為今次賽事打和,不過後尾三位評判一致裁定15歲英籍印度選手TAQDEER SINGH勝出。賽事結束後,阿邦喺台上被問到感受,佢話:「可以踏上呢個台好滿足,對方年輕自己咁多,請大家俾多啲掌聲恭喜佢勝出。」佢又話:「好多謝咁多人嚟支持自己,特別係媽咪,自己細個打咁多場佢都冇嚟睇過,今次佢嚟可能係家用俾得夠。好多謝今日嚟支持自己嘅人,唔好意思我冇贏到,但係我會繼續努力。」